QashqadaryoVKTTM.uz

Temirov Soatmurot Ahmedovich — inson hayoti uchun kurashni o‘zining eng oliy burchi deb bilgan, har bir operatsiyasida nafaqat jarrohlik mahoratini, balki yurak mehrini ham qo‘shadigan mohir neyroxirurgdir.

1964-yil 22-iyun kuni Yakkabog‘ tumani, B.Xudoyorov mahallasida tug‘ilgan Soatmurot Ahmedovichning hayot yo‘li butunlay tibbiyotga, insoniyat sog‘lig‘iga bag‘ishlangan.

🎓 Ilm va mehnat yo‘lida

1986-yilda Samarqand davlat tibbiyot universitetining Davolash fakultetiga o‘qishga kirgan yosh Soatmurot orzularini amaliyotga aylantirish yo‘lida izchil mehnat qildi. 1992-yilda universitetni muvaffaqiyatli tamomlab, Samarqand shahar ko‘p tarmoqli tibbiyot markazining Neyroxirurgiya bo‘limida internatura o‘tadi. Aynan shu davrda u inson miyasining nozik sirlariga chuqur kirib boradigan haqiqiy jarroh sifatida shakllandi.

1993-yildan 2000-yilgacha shu muassasada vrach-ordinator sifatida faoliyat yuritib, o‘z bilim va ko‘nikmalarini yanada mustahkamladi.

🏥 Viloyat tibbiyotida yangi davr

2000-yil 19-sentabrdan boshlab Qashqadaryo viloyat ko‘p tarmoqli tibbiyot markazining Neyroxirurgiya bo‘limida faoliyat yuritayotgan Temirov Soatmurot Ahmedovich viloyatda ilk bor:
🔹 bosh miya va orqa miya o‘smalarini olib tashlash,
🔹 bo‘yin, ko‘krak va bel umurtqalari disk churralari,
🔹 shikastlanishlar bo‘yicha murakkab jarrohlik amaliyotlarini yo‘lga qo‘ygan.

Bugungi kunga qadar u tomonidan 1000 dan ortiq yuqori texnologik operatsiyalar muvaffaqiyatli amalga oshirilgan. Har bir operatsiya — bemorning hayoti, oilasiga qaytgan quvonch, shifokorning esa g‘ururidir.

🌍 Xalqaro tajriba — mahalliy amaliyotda

Shifokor o‘z mahoratini doimiy ravishda oshirib keladi.
• 2004-yilda Moskva,
• 2017–2018-yillarda Koreya,
• 2023-yilda Belorusiya,
• 2025-yilda Sankt-Peterburg shaharlarida malaka oshirib, ilg‘or texnologiyalarni o‘zlashtirdi.

Xususan, 2023-yilda viloyat hokimligi tomonidan markazga mikroskop apparati topshirilgach, Soatmurot Ahmedovich boshchiligida bosh miyada murakkab mikroneyroxirurgik operatsiyalarni yo‘lga qo‘yish boshlandi. Bu esa Qashqadaryo viloyati tibbiyotida yangi bosqich, yangi sifat darajasini yaratdi.

🫀 Fidoyilik — shifokorning eng buyuk sifati

Bugun Temirov Soatmurot Ahmedovich — nafaqat malakali mutaxassis, balki yosh shifokorlar uchun ustoz, tajriba maktabining asoschisi sifatida tanilgan. Uning hayoti — o‘z kasbini chin dildan sevish, inson salomatligini hamisha birinchi o‘ringa qo‘yish namunasi.

“Jarrohlik — bu faqatgina qo‘l mehnati emas, bu yurakdan kelgan mehr, ruhiy bardamlik va mas’uliyatdir”, — deydi u o‘z suhbatlarida.

Bugun Qashqadaryo viloyat ko‘p tarmoqli tibbiyot markazining Neyroxirurgiya bo‘limida har bir murakkab operatsiya ortida ana shunday fidoyi inson — Temirov Soatmurot Ahmedovichning tajribasi, mehnati va sadoqati yotadi.